明儒呂坤說：廟堂之上言理，則天子不得以勢相奪。即奪焉，而理則常伸於天下萬世。故勢者，帝王之權也；理者，聖人之權也，帝王無聖人之理，則其權有時而屈。
周四立法會答問，便上演了一幕赤裸裸的「無聖人之理」——「其權有時而屈」的荒謬鬧劇！煲呔曾對議員的提問，完全冇答到，反而發爛渣老屈其講粗口、「爛仔」和「黑社會」！議員只不過詞鋒凌厲，招牌式的大聲，然而，與煲呔曾的「指控」相去十萬八千里。如今，煲呔曾影帝上身，交足戲，一臉錯愕：你睇吓，依家呢度唔係黑社會地方……你到底發生咩事幹？
喂！大哥！你混淆是非、顛倒黑白！煲呔曾仲話佢感到「心痛」，老朽倒為香港出了如此「小學雞」的特首而感到極度心翳！學者及前立法局主席黃宏發都指煲呔曾言論有攻擊性及冒犯性。依家呢度係尊貴嘅議事堂，曾先生，你到底發生咩事幹？
煲呔曾管治無能，臨走推出的施政報告，洋洋大觀，「針對」民間訴求嘅復建居屋，又加多了一個「新」字變成「新居屋計劃」，結果惹來劣評如潮，被指如「公眾六合彩」、「助長炒風」，對舊有居屋住戶不公平，有搞分化之嫌，這不是「不賢者而居高位，是播其惡於眾也」的寫照嗎？
新大樓話就叫「門常開」，如今上演的卻是議會內言論自由受損、理屈權壯，記者採訪受阻礙，這倒是教一眾納稅人感到更心痛憤慨！