政情：紅隧塞車 累大輝拱手讓位
立法會廠商會代表林大輝前日喺答問大會「處女」舉牌示威，點知上至煲呔曾下至立法會主席都冇理到佢，真係瘀爆。原來前日朝早佢仲有一單瘀事，就係佢因為遲出門口兼遇上紅隧大塞車，令佢錯失工商事務委員會副主席席位。
前日朝早八點半，工商事務委員會召開本年度首次會議選舉正副主席，民建聯黃定光按各黨派協調結果順利當選主席，但原本協助好做副主席大輝一直唔見影，亦冇人幫佢提名，於是公民黨陳淑莊提名上年度嘅副主席方剛頂上，其他議員亦冇異議，結果方剛順利冧莊。
大輝尋日同我哋講，當日佢首先遲咗出門口，之後又遇上返工時間加落大雨，喺進入紅隧嘅公主道大塞車，而佢又醒唔起自己可以託其他議員提名參選，最終錯失做副主席嘅機會。
雖然大輝好阿Q咁話冇所謂啦，但對於紅隧大塞車就十分氣憤，炮轟當局冇搞好本港交通。