政情：CY放飛機 秘密訪山東
表明「備選」特首嘅前行政會議召集人梁振英（CY）接連兩日喺原定嘅公開活動中「甩底」。話說身兼城市大學校董會主席嘅CY，原定尋日參加城大法學院嘅活動，但就臨時缺席。原來CY返咗山東家鄉，接受當地著名學府山東大學頒授社會科學榮譽博士學位，據聞會喺今早返港。
原出席城大開學禮
CY尋日原定出席城大法學院「中國法官法學博士課程」開學禮，唔少內地官員都有出席，但偏偏唔見CY蹤影，搞到班傳媒記者撲空。城大公關就話尋日朝早臨急臨忙先知CY放飛機，搞到連新聞稿上出席主禮嘉賓名單都改唔切，後來幾經追問之下才知道CY返咗山東家鄉。
CY籍貫係山東威海，本來當地大學頒個學位畀佢都唔出奇，但佢去得咁急又咁神秘，加上CY身邊嘅人，一直唔肯透露CY嘅行蹤，後來才承認CY去咗山東，實在令人有好多聯想。究竟CY原本係咪打算去完山東再去北京見「朋友」呢？係咪因為行蹤外洩後更改行程提前今早返港呢？