政情：煲呔曾一興即「早洩」

煲呔曾本周三公布任內最後一份施政報告，留低一大堆蘇州屎畀下屆政府，議員一如以往代表市民向煲呔曾問個究竟，當中毓民更質詢煲呔曾，點解委任民望超低嘅林瑞麟做政務司司長。本來大家都預咗煲呔曾敷衍回答了事，但點知煲呔曾突然發火反屈毓民講粗口、爛仔、甚至「黑社會」等，搞到長毛被辣興要掟雞蛋，大家事後都想知道煲呔曾究竟發乜神經。

替補機制諮詢已想爆發

有政府權威消息人士透露，煲呔曾谷咗幾年，早就想發洩。其實，早前一班示威者藉替補機制諮詢衝擊官員，一向容易畀人辣興嘅煲呔曾已經想開腔反擊，有建制派中人亦聽聞，煲呔曾喺撰寫施政報告時原本有段感性說話，重點正針對激進民主派嘅所作所為，但由於篇幅太長所以刪除咗，點知前日畀人稍為挑釁就急不及待「早洩」，所以今次「早洩」只係將想講又未講嘅說話一次過爆發。

建制派中人仲話，煲呔曾用「黑社會」三個字嚟鬧人，可能令市民好反感。其實自詡為政治家嘅煲呔曾，就算鬧人都應該識得要有分寸，今次咁樣發爛渣鬧人法，與佢口中嘅「爛仔」同「黑社會」無乜分別，事後仲要立法會主席同班官員下屬死撐護主，真係冇好帶挈。