中環出更：張永霖收藏名畫不為投資
前亞視主席張永霖（Linus）鍾情收藏藝術品，卓妮唔止一次喺拍賣活動見到佢嘅身影。尋日Linus帶備十幅心愛嘅中國畫，返回大埔亞視呢個是非地，暢談收藏畫作心得，卓妮於是去湊吓熱鬧，問佢至今花費幾多、收藏幾多名畫，佢就故作神秘笑稱：「咁即係問我三圍啫！」
Linus對數字咁敏感，全因佢收藏名畫目的純粹係滿足個人樂趣同喜好，並非為咗投資增值。佢由十七年前開始買畫，珍藏包括林風眠、張大千、齊白石及丁衍庸等名家之作。Linus曾經係年賺千萬元嘅打工皇帝，但佢謙稱自己閒錢有限，所以買畫都要睇住荷包嚟買喎。
幾年前，佢為咗以心水價錢買得心頭好，喺北京一個拍賣會上坐足三日，最終買到被喻為「現代八大」嘅畫家丁衍庸四屏畫作，總價十萬港元，開心到不得了，尋日仲特登帶出來同大家分享。
Linus仲教路，冇錢但有興趣欣賞中國畫嘅年輕人，不妨買入名畫嘅印刷本或海報，唔一定要昂貴嘅真迹，所以佢屋企都有張大千嘅畫作海報。