中環出更：楊素珊陳竹君開餐要有機
Go Green！崇尚綠色生活，近年熱爆。前電台高層兼公關公司老闆楊素珊（Susan），與藝術家陳竹君（Ada）都係「有機一族」，平時開餐地點，會首選位於香港藝術中心新開設嘅意大利餐廳Assaggio。尋日Susan就約埋老友Ada撐枱腳，來自意大利威尼斯嘅餐廳總廚Marco Furlan親自招呼。
Furlan擅長炮製手做意粉，選用意大利有機粗意粉，加入醃製銀鱈魚，意粉帶有原始風味，Ada大讚夠煙韌彈牙。再來一味「蟹肉菠菜雲吞配海鮮汁」，Furlan以意大利有機小麥製成嘅麵粉，配以菠菜汁搓成雲吞；餡料則用上蟹肉、青口及蜆等海鮮，啖啖鮮味。
月尾北京開畫展 宣揚環保
Ada平日買餸都講究食物來源，佢笑言以前經常以為大紅大綠嘅蔬菜就一定健康，原來只係商人嘅掩眼法。Susan都唔執輸，最近購入一個廚餘回收桶，將食剩嘅餸菜隔去水分後加入特製粉末，變成花肥，果然環保。
綠色意念亦啟發熱愛油畫嘅Ada，本月廿六日將夥拍Susan、著名音樂人金培達、名攝影師鄧鉅榮等人，以《生息──愛的延續》為題，喺北京798西門子藝術空間開畫展，將環保融入藝術。
卓妮