政情：立會工人趕工 塗鴉爆粗發洩
新立法會大樓為咗趕住入伙，工人大半年前已經不停日夜趕工。雖然立法會秘書處一再強調工程「已經完成」，但其實大樓內好多地方都未拆工程圍板，工人趕工嘅苦況分分鐘同大陸有得比，淨係睇前幾日有工人觸電後情況危殆，就已經感受到少少咩叫發展工程大陸化。
工程是否「已經完成」，睇吓呢張新鮮滾熱辣影嘅相就知，就有人發現新大樓九樓嘅升降機門有塗鴉，除咗寫住「2012年政府總部重建」，仲有就係用粗口「問候」立法會工程管工。立法會工地出現粗口字，我哋都寫過，但係到依家都仲未將所有塗鴉遮蓋，仲要喺機門呢啲咁顯眼嘅位置，好明顯係工程仲未完、仲有好多手尾執喇。
新立會大樓自入伙以嚟，甩漏甚多，依頭天花滴水，嗰頭個廁所就無得沖水，偷工減料嘅傳言好似陸續得到證實，今次機門上面仲寫咗一句「2012年政府總部重建」，唔通係預言大樓一年都頂唔到，出年就要重建？