中環出更：素顏錢慧儀為囝囝買火腿
前港姐錢慧儀（Winnie）自從嫁畀大生銀行家族後人馬清揚後，一直養尊處優，閒時行吓街、買吓嘢同去吓宴會咁，生活不知幾寫意。卓妮早幾日行過中環ifc時，就遇到一身便裝、戴住眼鏡嘅Winnie，喺city'super好悠閒咁閒逛買嘢，仲即興邊買邊試食添。
親自試食 嗒真味道
Winnie周圍睇吓望吓，買嘢食又揀吓廚具用品，一副賢妻良母嘅模樣。行行吓，佢停咗喺煙火腿凍櫃前，將目光停喺肥嘟嘟嘅煙火腿上面，之後就叫職員攞啲火腿畀佢試食，仲好認真咁嗒真啲味道添，最後買咗其中一隻煙火腿就畀錢離開。
卓妮上前問Winnie買咗啲乜，佢話囝囝好鍾意食煙火腿夾麵包，所以特登嚟入貨，點知冇食開嗰隻，要揀過第二隻，咪要試味囉，真係廿四孝媽咪。