九巴71K頻脫班等足半個鐘
公共交通工具原應以便民為依歸，但九巴脫班問題嚴重，令乘客大表不滿！本身為家庭主婦的阿雪每日皆乘搭九巴71K往返大埔墟與太和各站，以購物及接送孩子，但發現該線近日頻頻脫班，曾於一日內先後兩次等逾半小時才能登車，「呢條線正常應該係十分鐘左右一班，嗰日我一日搭咗兩次去接細路放學同買餸，兩次都等咗半個鐘先有車，你話係咪離譜？」
九巴發言人表示，事發當日由於沿途上落客十分多，導致行車過時，令班次延誤。當日車長已安排到達總站的班次盡快開出，亦安排部分巴士直接到中途站接載乘客。
「你話偶然一次我就信啫，但成日都係咁，冇理由日日都話乘客眾多？」阿雪直指九巴解釋難以接受，亦指上述班次乘客以長者為主，加上該線為穿梭大埔區的主要交通工具之一，希望九巴正視問題，並作改善。