廣東計劃玩歧視　養老措施半桶水

冇辦法啦，鬼叫煲呔曾任期只剩幾個月貨仔，玩到明年六月就冇得再玩。所以咯喎，呢一份施政報告可以話係「夕陽報告」，報告完之後就要失陷「高峰的快感」。

如果你話呢一份係曾蔭權歷年最好嘅施政報告，功夫茶唔會反對，因為以往幾份實在廢得交關，今次好好醜醜都叫做冇咁爛。情況就好似當年董建華腳痛落台，由於老董民望實在低得交關，造就煲呔曾得到極高民望。之不過可惜吖，經過七年實驗證明，原來有人衰過老董舊時。

呢一份施政報告雖然冇咁爛，不過仍然有好多荒謬之處。譬如話「廣東計劃」，名義上有助長者養老，實際上非常唔公平。不如咁啦，先睇睇廣東計劃有乜內容。

曾蔭權話喎，容許移居廣東並且符合資格嘅香港長者，喺當地領取俗稱生果金嘅高齡津貼，金額同本地高齡津貼相同。長者不必返香港住滿一定日數，亦可於當地領取高齡津貼。另外，考慮到長者喺內地定居，除咗財政以及生活環境之外，醫療服務亦係重要因素，將會研究推行社區照顧服務券，直接資助有長期護理需要嘅長者選用多元化服務。

嗱，荒謬之處就在於，點解只係容許移居廣東嘅長者受惠？移居廣西因乜事幹冇資格？移居福建因乜解究受歧視？你知啦，香港有唔少廣東以外嘅外省人，董建華都係上海出世啦，頤養天年嘅地方遍布五湖四海，你係敬老就應該敬得一視同仁吖嘛，冇必要搞分化。開講有話，不患寡而患不均，廣東計劃實在違反平等機會原則。

再講吖，民間人士一直要求增加生果金，曾蔭權有冇回應訴求呢？答案係冇嘅，高齡津貼金額維持不變。即係咁，就算你移居廣東而有資格領取雞碎咁多嘅生果金，你嘅生活隨時仍然係捉襟見肘。

施政報告又提出長者乘車優惠，建議六十五歲或以上長者以及合資格殘疾人士，可以全天候以兩元優惠票價，乘搭港鐵一般路線、專營巴士同渡輪。仲有就係推出公眾泳池月票，減輕長者游水做運動嘅負擔。冇錯，表面上係幾好嘅，不過功夫茶問問大家，如果公公婆婆冇錢開飯，有乘車優惠同泳池月票又點呢？小恩小惠係無助於安享晚年㗎，該煨！

簡單咁講，廣東計劃玩歧視，養老措施半桶水，冇咁爛嘅施政報告始終不入流。