中環出更：黃進達「正常價錢」訂造老西
富豪二代普遍都對衣着好講究，但近年逐步接班做康泰旅行社揸Fit人嘅黃進達（Jason）就奉行低調，衣着一啲都唔奢華。Jason對灰色及黑色西裝情有獨鍾，多年來一直幫襯相熟嘅舖頭度身訂造西裝，一套西裝只花費約一千多元，已經着得好舒適。
舒適啱身 不求名牌
卓妮日前喺一個酒會上見到Jason，講起衣着品味，佢謙稱自己着衫好普通，最緊要舒適、啱身，唔會特別追求名牌。不過，因為佢身形高大，好難買到啱身嘅西裝，所以多數幫襯金鐘、中環一帶嘅西裝舖訂造，至於價錢如何？佢笑稱係「正常嘅價錢」，大約一千多元啦！
Jason接手家族生意之後，經歷過馬尼拉人質事件、北京車禍等危機考驗，處事愈來愈見成熟，爸爸黃士心已放心畀佢全面接班。Jason話，爸爸已經退休，依家只會帶特色團出遊，仲自己設計行程添！