中環出更：莫華倫扮孫中山歌頌革命
今年係辛亥革命百周年紀念，康樂及文化事務署同香港歌劇院創作咗一套名為《中山．逸仙》嘅原創歌劇，今晚喺文化中心大劇院作世界首演。歌劇破格起用香港編劇及香港中樂團伴奏，仲由世界級男高音演唱家、香港歌劇院藝術總監莫華倫（Warren）擔任男主角孫中山添！
前日舉行歌劇總綵排，卓妮當然要先睹為快啦。當晚Warren孫中山上身，一身中山裝嘅打扮維妙維肖，同平時西裝骨骨嘅裝束相比，另有一番味道。為咗保持最Fit狀態，卓妮見佢成晚只係飲水同無糖可樂充飢，非常忍得口。
意大利唱腔 普通話演繹
Warren話，今次歌劇係用普通話演唱，同以往唱英文嘅感覺好唔同，確有挑戰性，但佢覺得套劇好有意義，用意大利歌劇嘅美聲唱腔，向全世界弘揚中華文化及歌劇文化。卓妮問佢點樣養好自己把聲，點知佢就打趣咁話：「瞓多啲囉，講少啲嘢，唔好咁多採訪囉！」
呢套歌劇係得到太子珠寶鐘錶集團首席贊助，Warren話，佢同集團主席鄧鉅明係老友，好多謝對方嘅支持，首演當晚對方一定會嚟捧場。Warren仲話，其家人都會嚟撐場，但囝囝到時就唔喺香港，所以預早睇咗綵排補數喇。