中環出更：簡文樂分享千件沉香珍品
冠軍科技集團主席簡文樂係個專業收藏家，無論書畫、瓷器及寶玉瓣瓣精，仲好鍾意同知音人分享。繼過去四年借咗數百件私人珍藏畀康文署展出後，今年都唔例外，借出近千件同「沉香」有關嘅珍品展出，而且全部未出過街嘅。
雖然簡文樂唔肯透露展品總值，但聽聞沉香有「植物中之鑽石」之稱，市價賣成一萬二千元一克，而且好多國家都已經限制出售，真係有錢都買唔到。
「祥和─中國香港之光：沉香經典御寶珍藏展」尋日舉行開幕禮，好多高官領事同文化界人物都專程撐場，簡文樂唔單止親自主持導賞團，仲出咗本書專講沉香歷史。原來沉香同鑽石一樣有分級數，主要透過色澤、香味同紋理分辨，當中以棋楠堪稱沉香之首，日本出產最靚。
拒展出最靚收藏
簡博士分析，近年嘅沉香價格按年倍增，好多拍賣會都已經絕迹，加上中國人開始識貨，令沉香價錢愈推愈高：「早幾場拍賣會都失手，細細件沉香都要成幾十萬元！」佢笑言今次展覽只係小部分收藏品，最靚嗰件日本金絲棋楠唔捨得拎出嚟喎。
展覽係今屆「世界文化藝術節」重點活動之一，今日起假中環大會堂低座展出，為期十七日。展覽分為「感恩」、「分享」同「永恒」三個主題，重點展品包括全球最大嘅「沉香釋迦佛說法」尊像、明朝永樂年間出品嘅「沉香木祝壽擺件」、「棋楠木雕童子拜觀音」等，咁精彩，大家得閒就去欣賞吓喇！
卓妮