政情：工商專聯大合照唔齊人
工商專業聯盟成立唔夠半年，已經出現分裂迹象。身為聯盟之一嘅自由黨尋日同其他成員割席，自行開記招鬧爆施政報告，與此同時，聯盟亦自行開記招發表對施政報告嘅意見，總之各有各做，但立場就好唔同，所以大纜都扯唔埋。直到聯盟開完記招準備影大合照時，聯盟之一嘅專業會議劉秀成覺得咁樣好似唔係幾好，於是勸自由黨主席劉健儀（Miriam）埋位影相。
點知Miriam似乎唔係好想影，反而轉身去問副主席周梁淑怡嘅意見，莎姐即時將個波踢番畀Miriam。Miriam惟有硬着頭皮拉埋黨友方剛、張宇人入房影相，點知入到房嘅時候，經濟動力劉皇發及專業會議黃宜弘已經去如黃鶴，張大合照終歸都係唔齊人，搞到咁嘅田地，真係情何以堪。
記招之後，經濟動力三位議員拉埋專業會議石禮謙去快餐店醫肚，點知去到就撞到方剛同自由黨榮譽主席田北俊喺度食嘢，但兩班人坐得好開，明顯唔係同路人。最慘莫過於做和事老嘅劉秀成，佢畀人賣甩，一支公去買外賣拎走去第二度食算數。