插死你！插死你！冷血狂徒插死你！街坊街里插死你！
嗱嗱嗱，大家唔好以為功夫茶傻咗，更加唔好以為自從江澤民「死而復活」之後引發撞邪嘅靈異現象，實情係功夫茶正常過正常，插死你言論絕對有根有據。
首先講講冷血狂徒插死你，將軍澳十月二日陷入「月黑風高插人夜」，戴口罩嘅變態刺客分別喺四個地方出刀捅人，失驚無神先後刺傷四名無仇無怨嘅路人甲乙丙丁。口罩刺客行兇之時總會唸唸有詞：「插死你！插死你！」
既然係冷血狂徒插死你，點解又牽涉到街坊街里插死你？此「插」不同彼「插」，功夫茶嘅意思係話，街坊街里群起怒插警方，狠批師兄師姐緝兇無能，搞到將軍澳居民人心惶惶。更加激到街坊街里七竅生煙嘅仲有一項不可饒恕嘅反智行為，警方居然一直隱瞞案情，對於冷血狂徒三緘其口，害到唔少坊眾懵然不知，毫無防範隨時命喪刀下。你話嘞，身為警務人員而拒絕示警，係咪應該接受市民狂插吖？
唉，講真，功夫茶直情覺得成個特區政府都應該接受狠狠一插，事關香港愈來愈似一個凡事保密嘅專制社會。你估今次係警方第一次封鎖消息咩？錯，警方美其名改善通訊系統，實際上係截斷傳媒得知案情嘅渠道。你知啦，新聞工作者以往一直靠追蹤警方通訊而趕赴事發現場，家陣截斷渠道等於掩人耳目。
換言之，記者處境變得被動，所有消息全靠警察公共關係科發放。佢老爺奶奶鍾意講就公告天下，唔鍾意講就諱莫如深，講少啲又得，講遲啲都得，你吹得佢脹乎！
除咗警方之外，消防處又話改善通訊系統喎，實際作用如出一轍，同樣係截斷傳媒得知案情嘅渠道。
記唔記得副總理李克強訪港期間發生過乜嘢事呀？除咗港大學生哥被禁錮、六四Ｔ恤男被抬走之外，官老爺企圖封鎖消息，記者被拒諸門外，身處「核心保安區」嘅李克強，一言一行全憑官方喉舌發放。新聞自由受到嚴重威脅，香港嘅核心價值淪為核心保安嘅蹂躪對象。
所以話啫，香港警察愈來愈似中國公安，特區政府愈來愈似獨裁政權。之不過咁，功夫茶奉勸官老爺，紙永遠包唔住火，真相隱瞞得一時，隱瞞唔到一世。以為封鎖消息就有利於愚民統治？席捲中東嘅茉莉花革命清清楚楚告訴世人，真相一旦揭發，後果烽火燎原。
計功夫茶話齋，封鎖得了消息，壓制不了民憤。假如愈來愈多人向政府怒吼插死你，咁就真係會瓜老襯o架！