呢三個新鮮滾熱辣自動當選嘅參選人都有一共通點，就係三個都係現屆區議員，而且來頭唔細。好似南區香港仔選區嘅黃靈新咁，就係小巴大王黃文傑之子，公司坐擁幾百架綠色小巴，喺交通界好有影響力。而沙田廣源選區嘅陳敏娟就係沙田公民力量成員。葵青華麗區嘅黃耀聰雖然無黨派，但亦都服務當區街坊好耐。
今屆選舉本來收到九百三十五個提名，但有二十人因提名無效、退選等，令總候選人數得番九百一十五名，扣除自動當選後，就由八百三十九名候選人，角逐三百三十六個議席，即係平均二點五個人爭一個位。當中選情又以油尖旺區最激烈，五十一人爭十六個議席，而沙田區就競爭最細，雖然有成六十九人爭，但亦有三十個議席。