政情：少女素玉似北韓人？

最近唔少政界女士都畀人擺相上社交網站，好似立法會議員梁美芬、劉慧卿等，就連蔡素玉張「玉照」近日都畀人擺咗上facebook。「玉照」中嘅佢梳咗個爆炸頭、着住件反領外套，入面襯咗件直條衫，打扮都幾樸素，有網友仲問蔡素玉係唔係喺北韓出世添。

蔡素玉張「玉照」一出街就引起唔少網友搭訕，有網友話覺得佢依家同後生個樣落差唔係好大，但亦有人話似藝人尹光扮女人。蔡素玉話呢張相係佢十一、二歲由內地鄉下嚟香港時影嘅，至於網友點攞到佢張相，佢就話連佢都唔知。