政情：兩大學女生 成商貿大使
中文大學嘅馮芷祺（Jackie）及理工大學鍾力爽（Rachel）獲選為貿發局「商貿大使」，遲啲就會遠赴外地推廣香港。其中Jackie喺中大修讀社會學，本應佢同從商大纜都扯唔埋，但佢話參加咗大使計劃後，就改變咗諗法，對商貿興趣多咗，仲立志創立一間社會企業，希望用學到嘅知識去填補社會制度嘅漏洞喎。
另一位大使Rachel來自佛山，喺理大修讀市場學，佢話來港讀書係為咗了解香港，而參加咗大使計劃就更加開心。Rachel話，計劃中曾訪問某集團創辦人，聽到嘅白手興家故事，令佢明白到原來興趣都可以變為事業。佢哋兩人係由三百幾位參加者中脫穎而出。
貿發局副總裁方舜文就話，貿易係香港重要一環，希望可以透過呢個計劃擴闊年輕人嘅視野，其實個人發展可以有好多可能性，前路未必一定平坦嘅。