政情：工商專聯散散地
由經濟動力、專業會議、自由黨再加上立法會議員「中指黃」黃宜弘，合共十二位議員組成嘅工商專業聯盟，成立之初風頭一時無兩，一躍成為立法會內手執最多票嘅聯盟。不過見微知著，從聽日政黨政團回應施政報告嘅安排就睇到，聯盟似乎有啲散散地，事關佢哋各自各開記招，無晒隊形。
立法會新大樓提供咗兩間新聞發布室畀議員開記者會，一間係1A、另一間係1B。專業會議何鍾泰同埋梁美芬一口氣訂咗1B房兩個孖住共半個鐘嘅時段，似乎係想爭取最多時間發表意見。自由黨主席劉健儀就選擇咗喺1A見記者，尾隨自由黨嘅就係經濟動力，而經濟動力又好似專業會議咁，訂咗兩個時段爭取更多時間。
林健鋒撐12人會一齊出現
實情開記者會呢回事，時間長短根本唔係重點，但係從專業會議、經濟動力同自由黨「分房」呢個鋪排，即時令人聯想到聯盟散咗，否則有乜理由佢哋十二個唔一齊出嚟見人？我哋問過聯盟召集人Jeffrey林健鋒，Jeffrey話聯盟今日開會會傾吓安排，跟住仲實牙實齒話佢哋十二個會一齊出嚟見大家㗎！總之聽日睇吓大家會唔會乖乖歸隊，定係要Jeffrey到處執雞仔，就知道佢講得啱唔啱嘞。
其實泛民主派都唔見得好團結，以前幾位草根派議員李卓人、馮檢基、梁耀忠、何秀蘭同埋張國柱都係一齊開記者會，但隨着工黨即將成立，今年佢哋都各自見記者。阿人、阿柱同埋何秀蘭三位籌組工黨嘅就走埋一齊，唔入工黨嘅阿忠同阿基就被孤立，佢哋都好大方承認就係工黨同唔係工黨之別。
不過阿基嘅處境仲有個搞笑位，話說人民力量陳偉業同黃毓民各自訂咗兩個分開嘅時段，而阿基就夾咗喺中間。原來人民力量又係想霸多啲時間講嘢，點知又唔夠手快，結果畀阿基攝咗喺中間，所以人民力量要搵阿基傾吓可唔可以對調。人民力量不時將阿基踩到地底泥咁差，唔知道阿基肯唔肯行呢個方便畀人民力量呢？