中環出更：葉時忠調返台 難捨香港美食
長榮航空香港分公司總經理葉時忠（Clark）最近喜上眉梢，事關佢將調返台灣總部，負責管理全球客運業務，空缺由總公司企劃部經理邱浴沂（James）接任。
陳光丕靚麵餞行
上周四中午，台北經濟文化辦事處商務組組長陳光丕同一班同僚，喺會展中心會景餐廳為兩人送舊迎新。Clark話最唔捨得香港嘅美食及維港美景。
陳光丕好有心，特登揀咗坐擁維港靚景嘅會景餐廳為Clark餞行。餐廳提供獨特嘅自選麵食吧，食客可自選新鮮配料炮製心水麵食。陳光丕話，佢第一次幫襯就食咗四碗唔同湯底嘅麵食，大呼過癮，推介之選係豬骨湯及冬蔭功湯底。Clark話，香港人追求速度及效率，連飲食都滲透快靚正嘅文化。
新上任嘅James坦言仲未習慣港式緊張生活，不過緊湊嘅工作陸續有來。
卓妮