中環出更：何琍琍歎靚菜 開埋有機農場
潮流興有機飲食，富豪趙世光太太何琍琍（Lily）都加入有機一族，唔止勤食有機菜，仲喺江蘇投資開有機農場。
雍容華貴嘅Lily，前日出席日本護膚品牌Domohorn Wrinkle登陸香港嘅發布會，原來佢係呢個品牌嘅粉絲。見Lily皮光肉滑，皺紋都唔多條，佢嘅秘訣原來全靠食得健康。佢自爆日日食燕窩，食足幾十年，平日三餐則以蔬菜、生果為主，好清淡。為確保食物質素，年前索性喺江蘇鄉郊買地開農場，出產有機菜、水果，仲有有機豬同有機雞。
莊偉茵獲獎 以為被整蠱
Lily話，農場佔地數十萬平方米，近日啱啱奠基，明年底開業，佢計劃將農產品內銷中國，部分會分銷嚟香港，聽講產品名都改埋，但Lily話，暫時唔講得住喎。
同場仲有啱啱獲選為「全球影響一百強」風雲人物嘅國泰企業事務董事莊偉茵（Quince），見佢風塵僕僕，原來剛由澳洲度假返港。Quince話，此行係探仔，事關大仔Julian啱啱入讀澳洲國立大學，全家人好唔捨得。開學無耐，佢同老公急不及待飛過去探仔。講起攞獎，Quince話事前毫不知情，從朋友口中得知自己獲獎，仲以為畀人整蠱，認真搞笑。
卓妮