政情：范太落區冧少數族裔
對參選特首態度飄忽嘅范太，尋日就走咗去融樂會同班少數族裔嘅年輕人真情對話。范太話好開心可以聽到好多少數族裔年輕人嘅心底話，又話班少數族裔雖然喺香港住咗咁耐，但喺睇同寫方面仲係無晒符，政府要諗吓計幫吓佢哋喎。
唐唐CY懶理融樂會
唔知係咪驚畀人話佢落區做騷，范太多次強調今次落區探訪同特首選舉無關，又話會將呢段日子嘅所見所聞寫成文字，交畀政府當局，盡番監察政府嘅責任。
融樂會總幹事王惠芬（Fermi）大讚范太係第一個肯同少數族裔傾偈嘅政治人物。王惠芬又話，好想有其他疑似特首候選人肯落區了解少數族裔喺就業、學習等方面嘅問題，佢曾經寫咗好多次信，邀請唐英年落區探訪，但唐英年就覆都無覆過。Fermi又話五、六月嘅時候都有試過邀請梁振英去機構探訪，但被拒絕。佢話，雖然少數族裔無權投票選下屆特首，但佢哋係香港嘅一分子，希望啲疑似特首候選人關心吓佢哋嘅需要，唔好當佢哋透明。