十六歲少女胡蕊珺真係好可憐，一出世已經患有肌肉萎縮症，六個月大就要喺喉嚨開個窿設置呼吸造口，長期使用呼吸機，又要經常抽痰。見到一個受盡磨難嘅小妹妹，正常人都會心有慼慼然。
之不過咁，醫院管理局以及社會福利署一眾官僚可能唔係正常人啩，佢哋居然狠心將蕊珺小妹妹當波咁踢，呢個大腳傳中，嗰個一腳勾銷，你都咪話唔殘忍！
成件事係咁嘅，盡心盡力湊大胡蕊珺嘅媽媽胡太開始覺得自己能力有限，擔心愛女日後得唔到適當照顧，於是透過學校社工先後兩次接受社署評估，打算申請資助住宿照顧服務。兩次評估嘅結果都係「有極高護理需要」，理論上當然申請成功啦。
可惜荒謬嘅情況出現嘞，醫管局話喎，申請輪候嚴重智障療養院及普通科療養院服務係唔得嘅，因為蕊珺唔係智障，而且要使用呼吸機不符合資格。學校社工改而尋求社署協助，要求安排蕊珺輪候嚴重殘疾人士護理院服務。哈，死得佢吖，社署居然話喎，蕊珺所需照顧程度超出嚴重殘疾人士護理院範圍，所以唔接受申請，建議向醫管局申請療養院服務。
簡單咁講，官老爺都承認胡蕊珺確係極需要照顧，之不過官僚主義唔係太僵化就係太懶惰，一個二個以種種藉口拒人於千里之外。打個譬喻吖，有一個垂死病人要求醫生急救，但係醫生耍手擰頭，認為病情實在太嚴重嘞，超出自己能力範圍，所以決定見死不救。
折騰一年都輪唔到任何資助住宿服務，眼見愛女被兩個部門推來推去，胡太狠批現行制度互相矛盾。胡太仲炮轟醫管局：「你話我個女唔係嚴重智障唔合資格，我可以接受，但普通科都入唔到，竟然係因為佢要用呼吸機？醫院冇理由冇呢種器材囉！」
尋日，胡太同蕊珺向申訴專員公署投訴，初步得到署方認同兩個部門都有問題。
計功夫茶話齋，梗係有問題啦，一個患有肌肉萎縮症嘅小妹妹，終日受困於一部輪椅，搵政府幫手照顧係天經地義嘅事。既然社署都評估「有極高護理需要」，官老爺拒絕提供護理服務就係冷血。喂，莫非醫管局同社署家陣互相鬥冷血？唔好玩啦，人命關天呀！
嗱嗱嗱，唔該申訴專員公署秉公處理，功夫茶絕對唔介意專員大人將醫管局同社署剷上天花板。你知啦，官僚僵化確係害人不淺，唔教訓係唔得嘅。最好仲係剷到相關官僚變咗肌肉萎縮，為蕊珺小妹妹出一口烏氣吖嘛！