區議會選舉下月就會舉行，但泛民主派政黨至今依然立立亂，日前仲傳出有「假泛民」候選人添。尋日民主黨、民協、街工、職工盟等泛民區選聯盟，就公布咗個聯合政綱，仲話泛民團結有共識，二百三十五個候選人絕對無撞區，稍後仲會製成名單刊登於報章，等支持佢哋嘅選民提防假冒喎。
泛民區選聯盟咁做，一眼就知係要同無參加協調機制嘅人民力量及社民連劃清界線，兼且避免有候選人冒泛民之名渾水摸魚。聯盟坦言，佢哋好難控制其他黨派點樣調兵遣將，加上建制派坐擁無限資源，地區樁腳又有一定勢力，所以形容今屆區選係「有史以來最難打」嘅。
雖然有聯盟成員形容到選情危機四伏，但亦有成員覺得只要投票率夠高，情況可以樂觀嘅。今屆當選嘅區議員有機會參選明年立法會超級區議會議席，所以聯盟話今屆區選唔係打地區工作咁簡單，所以呼籲選民要有「危機感」，認清邊個先係爭取民主嘅政黨喎。