台灣暢銷小說作家張曼娟，早前接替突然辭職嘅羅智成出任光華新聞文化中心主任，下星期就會首次以光華主任身份開記者會，仲話帶咗份神奇禮物畀大家。原來張曼娟請咗台灣歌手到記招現場獻唱，開記招都請歌手咁有創意，香港啲公關公司真係要學吓嘢喇。
張曼娟上月先至上任，就要負責宣傳「二○一一年台灣月」活動，下星期二仲會喺光華搞記者會添。不過，可能唔想令人覺得太硬銷，身為小說作家嘅佢就發揮創意搞搞新意思，請咗台灣創作女歌手魏如萱現場獻唱，仲話帶咗台灣秋日收成嘅「好滋味」送畀大家咁話，開記招有歌聽有嘢食，認真有創意。
張曼娟對於宣傳台灣不遺餘力，唔單止搞記招，仲會喺香港親自主持多個「台灣月」嘅活動，包括請台灣當代文學大師來港舉行座談會，又會同知名人士講吓北投特色台灣菜，真係活動多籮籮。
