政情：愛駒興奮咬大輝手指
一向出名愛馬嘅立法會議員林大輝之前原本有兩隻馬，分別叫「更奇妙」同埋「極奇妙」，但係一隻就喺○九年一次出賽時跌斷腳，另一隻就已經光榮退休。大輝喺佢本議員通訊中披露，佢早排買入新駒「太奇妙」。今年三歲嘅「太奇妙」來自愛爾蘭，仲已經喺今年五月落場比賽。大輝形容佢走勢凌厲，相信假以時日，一定會有一番成就。
大輝話自己因公務繁忙，一直無時間去探愛駒，直至立法會休會，先有機會去馬房幫佢打打氣。大輝話「太奇妙」見到佢時表現得特別活潑同熱情，仲喺大輝餵佢食紅蘿蔔嗰陣輕輕咬咗佢嘅手指一啖。