自揭有婚外情嘅前政務司司長唐英年，日前喺白加道官邸拖埋老婆出嚟交代事件，呢幅歷史性圖片，又成為網民嘅惡搞材料。日前有網民將佢哋幅拖手相改頭換面，分別將疑似特首候選人梁振英及社民連立法會議員梁國雄個樣，貼咗落唐太塊面上，改圖水準甚高，而且睇落仲有幾分相似，認真有趣。
香港網民向來好有創意，呢類咁嘅改圖最緊要就係細心，要搵張貼得啱啱好、冇乜破綻嘅相片先至得，但唔係咁容易。今次兩張改圖最好笑之處，係改完之後連個表情都配合埋，幾近完美配合。距離特首選舉愈來愈近，睇嚟呢類惡搞之作將會愈來愈多，市民不愁冇得笑啦。