政情：電子鎖失靈 議員遭禁錮

今次受害嘅主角，就係立法會議員陳淑莊（Tanya），被困足足十幾分鐘。回想事發經過，Tanya話見到隸屬其他議員辦公室嘅職員不斷大力推門，更有人試圖踢開道大門添。搞到咁激，皆因八樓全層所有電子門鎖都失靈，議員辦公室嘅門鎖有出無入，而通往議員辦公室同電梯大堂嘅門鎖更全部失靈，出入都唔得，如果新大樓發生火警，情況真係不堪設想。

鼠患隔音仲未搞掂

睇番八樓辦公室規劃，全層足足有十四個立法會議員辦公室，Tanya就笑言若政府唔想佢哋投票，只要鎖住佢哋就乜都搞掂晒，即使立法會響鐘叫人投票，成層樓嘅議員隨時落唔到去喎。除咗電子門鎖出事，立法會主席尋日仲承認，新大樓仍存在鼠患，遷入一個月已捉到兩隻老鼠，但佢話地盤有老鼠不足為怪喎，遲啲會做一次徹底滅鼠行動，仲講笑話要向「鼠王芬」梁美芬請教滅鼠之道。

主席又透露，唔少議員透露辦公室嘅隔音唔理想，成日聽到隔籬房傾偈，更有人投訴聽到樓上傳來的聲音喎，佢哋已經搵咗政府建築署專業人士到場勘察，仲提出咗改善方案，有信心解決到問題咁話。新大樓工程搞到千瘡百孔，連工聯會潘佩璆都慨嘆咁趕工法，只會糟蹋晒啲靚材料，原來佢自以前移民新西蘭時學過木工，一睇就知大樓內好多手工唔掂喎。連潘醫生都咁講，可見夾硬要立法會遷入新大樓嘅煲呔曾幾咁乞人憎吖！

Tanya會參選嚟緊中西區區議會山頂選區，同區仲有自由黨陳浩濂。