中環出更：鄭海泉笑對唐唐婚外情
前政務司司長唐英年（唐唐）爆出婚外情醜聞，令全城嘩然，但挺唐派連日來將婚外情合理化。卓妮尋日喺中環ifc遇到前滙豐大班鄭海泉，即時想起佢喺○六年曾經捲入一宗桃色恐嚇信案件，於是問佢點睇唐唐婚外情單嘢啦，點知佢即笑騎騎話：「唔知呀，冇乜留意，點鬼知人哋咁多嘢吖！」
尋日下晝，卓妮見到西裝骨骨嘅鄭海泉同太太曹志安、外母、囡囡同工人齊齊喺ifc間city’super行街買餸，共享天倫樂。
股市波動未驚過
過咗一陣，佢哋挽住一袋二袋嘢行出嚟，囡囡就攞住啲購物收據，行去換取免費泊車票，而鄭海泉就同太太、外母喺旁邊等候，順便睇吓舖頭門口嘅熟食部有乜好嘢食。
卓妮趁機上前問吓鄭海泉近來忙啲乜，佢話早幾日先上完北京開會，仲喺當地玩番吓。近期股市相當波動，但佢都幾樂觀，覺得唔係咁差，仲邊講邊指住間Apple專門店，話間店舖人頭湧湧，就知個市道唔差喎，仲自爆啱啱先至買咗部iPad2平板電腦；原來鄭海泉都係擁躉。
對於Apple「教主」喬布斯（Steve Jobs）逝世，鄭海泉都感慨覺得好可惜，走咗個靈魂人物，天妒英才喎。
卓妮