劏房大家聽得多，而且危機重重，隨時火光熊熊，土瓜灣馬頭圍道唐樓劏房奪命火歷歷在目，諗起都打冷震。咁大家又有冇聽過「劏檔」呢？如果未聽過，今日就要聽古仔嘞。
未入正題之前，先同大家溫故知新。去年十二月旺角花園街排檔發生三級火警，「火燒連環檔」一發不可收拾，大話夾好彩冇燒死人咋。事後咯喎，消防處建議擴闊排檔中間通道，由原來嘅四點五米增加至六米，方便市民走火警同埋執行救援工作吖嘛。
好嘞，事隔十個月之後，你估情況有冇改善吖嗱？本報記者現場直擊發現，花園街密密麻麻嘅排檔，通道不但冇擴闊，反而變得愈來愈狹窄，闊度不足標準一半，原因係近半排檔以劏檔形式分租，令周圍環境非常擠迫！
喂喂喂，大家不妨幻想一下，萬一再有火燭，假如逃生無路，一旦阻礙救援，後果會係點嘅呢？上次就大話夾好彩冇搞出人命啫，可惜好彩呢家嘢係完全靠唔住㗎。好似前政務司司長唐英年咁吖，出晒名一世夠運，家陣都要樣衰衰咁承認「感情缺失」啦，令原本已經低殘嘅民望進一步拖低，簡直係黑氣纏身。所以話啫，時來風送滕王閣，運去雷轟薦福碑，人有三衰六旺真係話唔埋㗎。
既然消防工作唔可以靠好彩，理論上當然靠政府好好管理，否則納稅人交稅實在冤枉。簡單咁講，食環署應該取締劏檔，正如屋宇署應該取締劏房，事關只要出現「一檔兩租」嘅情況，兩個檔主嘅雙倍貨物一定會嚴重阻礙通道。
之不過可惜吖，食環署唔知係發雞盲定係大食懶，居然採取坐視不理嘅消極態度，一直以證據不足作為藉口，至今對於違規分租嘅檔口依然係零檢控。係呀，劏檔係違規㗎，法例寫到明不准分租。
唉，證據不足喎，呃鬼食豆腐咩！記者係咁意同部分檔主嗲兩句之嘛，即刻套到分租情況，月租大概一萬銀，每月向中介人繳交八百元介紹費。所謂中介人，咪即係陀地囉。粗略估計，中介人相當肥仔㗎，以整條花園街大約七十五個劏檔計算，每月淨袋六萬元。
嗱嗱嗱，唔好怪功夫茶以小人之心度君子之腹，食環署對於花園街劏檔情況隻眼開隻眼閉，會唔會係勾結陀地嘅結果呀？定係欺善怕惡唔敢喺太歲頭上動土？
即係咁，取締劏檔有三大好處。首先當然係避免唔小心火燭之時走投無路，其次係杜絕陀地稱王稱霸，而最重要嘅係，食環署洗脫「官黑勾結」嘅嫌疑吖嘛！