財經事務及庫務局局長陳家強係世界知名嘅經濟學者，加入政府做高官前係科技大學工商管理學院院長，在任幾年將科大商學院辦得有聲有色，學生對該校嘅工商管理碩士課程更加係趨之若鶩，好可惜，佢○七年決定加入政府做高官，累佢形象大插水，其實佢都係啱教書多啲。
特首辦尋日上載一條短片上網，教大眾認識人民幣機遇，負責主講嘅正正係陳家強，呢段片長達七分鐘，佢喺片中侃侃而談，三言兩語已經解釋咗唔少複雜概念，呢種教學表現，同佢做官乏善可陳嘅表現簡直差天共地，如果當初並唔係轉行，相信成就絕對不止於此。
陳家強在任局長四年，市民大眾都唔係好知佢做過乜，淨係記得佢畀泛民主派突擊，令到財政預算案臨時撥款被否決，加上派六千元又派到亂晒龍，上述種種都同佢喺科大時受到眾人景仰嘅情況大相徑庭。其實夕陽政府剩番幾個月啫，不如提早跳船返去做學者好過啦。