政情：湯恩佳瘦身因減得加
時下潮流興修身，原來孔教學院院長湯恩佳都試過，但最終係因減得加喎。湯院長嘅體形近期肥咗好多，佢笑笑口話自己以前唔係咁㗎，只係自從用咗一個名為「頻譜屋」嘅產品之後，幾個月內體重竟然暴升三十磅。
湯院長話，某年佢返鄉下三水，行經一間「頻譜屋」專賣店，聽售貨員講，呢間「屋」喺內地好流行，利用高科技醫治奇難雜症，仲可以強身健體，佢於是買咗一間返屋企試。佢形容間「屋」好似流動洗手間咁大，用嘅時候感覺就好似焗桑拿咁。
用咗幾個月之後，湯院長唔單止無瘦到，仲重咗三十磅添。後來佢睇番說明書，先知原來要一路用一路補充水分，可能因為冇跟足指示而因減得加喇。雖然湯院長肥咗，但依然容光煥發、精神奕奕，最重要係瞓得好嘛！