政情：精英運動員區選披甲
自由黨今年派出唔少年輕人參加區議會選舉，其中年僅廿六歲嘅徐潤容（Terry）會出戰西貢環保選區。雖然佢年紀輕輕，而且入黨只約兩年，但曾經係香港精英運動員。Terry話，運動員生涯令佢培養出堅毅、忍耐同力爭上游嘅性格，好有信心自己一旦成功當選，可以做好區議員呢個崗位喎。
Terry以往主攻短跑同跳遠，體能同爆炸力毋庸置疑，所以家陣落區企幾粒鐘宣傳對佢嚟講真係濕濕碎。佢話自己細個好窮，呢一段經歷令佢磨練出一份不屈不撓嘅意志，所以細細個已經立志要出人頭地，廿歲出頭已經學人創業，雖然失敗好多次但亦從未放棄。
Terry畢業於拔萃男書院，原來佢嘅政治啟蒙老師係已退出自由黨嘅新民黨副主席田北辰，兩師兄弟傾談起來分外投契。雖然田二少已退黨，但Terry仍然覺得自由黨理念最啱自己，所以從冇諗過跟田二少過檔喎。除咗Terry外，已報名出選環保選區嘅仲有方國珊及張志董。