政情：建制派謀掌財委會
今屆立法會已去到最後一年，十八個事務委員會嘅主席人選，大致上都係跟番三年前嘅協調結果行事。但並無協調嘅財務委員會，最終會花落誰家仲係未知數，事關建制派正諗緊派人同現任主席、民主黨副主席劉慧卿鍊過。眾所周知，負責批錢畀政府嘅財委會係立法會三大常設委員會之一，建制派爭贏個位可以幫夕陽政府保駕護航。
前晚建制派舉行每月一次嘅例行飯局，雖然畀面赴會嘅人唔多，但建制派各政團都有派代表亮相。據聞民建聯主席譚耀宗喺席間做醜人，提出不如搵人去爭財委會主席個位，然後問在座有冇人有興趣。不過，成圍枱十幾人，無一個想做，似乎佢哋想搵人擔旗都唔係咁易。有建制派議員覺得，前晚出席飯局都唔齊人，根本唔能夠代表晒所有建制派議員嘅立場喎。
話時話，依家經濟動力、專業會議及自由黨等，共十二位議員組成工商專業聯盟後，佢哋加埋手執九票嘅民記及四票嘅工聯會，總共有廿五票，牌面上夠贏只得廿三票嘅泛民主派。但大家唔好忘記，立法會仲有揸住關鍵少數票嘅「五散人」，今屆立法會之初，卿姐得以跑贏財委會主席，背後正是疑似得到五散人襄助。到底結果會係點，明日財委會會議就自有分曉。
鄭家富辭帳委會搵真銀？
財委會再現競爭，但政府帳目委員會則有人退出，獨立議員鄭家富日前以私人理由退出帳委會。有傳話阿富呢個位係佢以前所屬嘅白鴿黨嘅，所以要讓番個位出嚟，但亦有傳佢想抽多啲時間搵真銀，因為佢啲婚姻監禮工作大有可為，與其花時間喺議事堂同人哋口舌爭辯，不如接多幾單生意做吓好過，況且佢連今屆嘅區議會都唔選啦。
與此同時，參選區議會嘅民協馮檢基，亦決定唔做現屆最後一任福利事務委員會主席。阿基話，應付區選已經令佢忙到暈，遲吓仲可能要參與泛民內部嘅特首選舉初選，到時仲邊有咁多時間吖！阿基建議社福界代表張國柱頂上，但相信要等泛民飯盒會傾完先至可以作實。