中環出更：盧文端手抄電話簿救命
現代人對手機嘅依賴度愈來愈大，如果唔見咗手機真係好大鑊。全國政協委員盧文端最近遊倫敦期間就經歷遺失手機驚魂，卓妮以為佢唔見咗手機入面啲電話號碼會好擔心啦，點知佢好淡定，事關佢隨身攜帶一本手寫電話簿。老土通訊錄成為救命仙丹，卓妮都要讚句：「薑愈老愈辣！」
倫敦失手機
上月初盧文端陪伴細女盧詩雅去倫敦讀寄宿學校，點知中途唔見咗部手機，於是急急腳買部新手機同電話卡用住先，但估唔到張Sim卡同手機唔啱Size，要人手裁剪電話卡至得，總之搞到好唔得閒。佢話經此一役體驗到，唔見手機與外界斷絕音訊好唔方便。
一般人好頭痛唔見手機入面啲電話號碼，但盧文端笑稱冇有怕，然後好淡定喺西裝袋中攞出卡片咁大嘅摺疊式電話簿。嘩！本簿攤開有幾呎咁長，上邊密密麻麻寫滿晒重要電話。所以話，老土未必一定冇用嘅！