中環出更：范元芳逛蘇富比齋睇都滿足
收藏藝術品可以提升個人品味外，仲有投資價值，所以大型拍賣會經常都逼滿人。好似前日灣仔會展舉行嘅蘇富比中國書畫秋季拍賣會場，卓妮就見到頂尖男裝品牌「詩閣」（Ascot Chang）董事總經理張德祥太太范元芳，原來佢對張大千作品情有獨鍾，家中藏有唔少大師嘅巨幅潑墨畫作，當日見到咁多大師作品，就算冇競投，大飽眼福已心滿意足。
為睹張大千作品
蘇富比秋季拍賣會今日結束，雖然有幾幅大師張大千作品公開拍賣，但張太志不在此，而係一睹大師愛女張心嫻嘅珍藏展覽，尤其係首度公開嘅潑墨潑彩紙本六摺屏風《夏山隱居》。張太仲買咗本張心嫻回憶錄《在爸爸身邊的日子——憶父親張大千》，笑言可以幾日不出門，品味一番喇！