中環出更：蔡加讚Apple Store朝聖掃靚「芒」
中環ifc間Apple專門店自從開幕後，唔少名人都走去朝聖，湊吓熱鬧。卓妮早幾日就見到玩具大王蔡志明囝囝蔡加讚（Karson）一身潮男打扮去掃貨，隨行仲有一位女士同兩個保鏢，但就唔見佢嘅甜蜜女友汪圓圓。
行咗一段時間後，卓妮見Karson兩手空空咁行出門口，起初以為佢睇唔啱無買嘢，但原來佢有兩個隨行保鏢代勞，各人抽住一部Thunderbolt廿七吋顯示器，仲有一袋二袋電腦用品，滿載而歸。
提升錶行系統
卓妮上前同Karson傾咗幾句，原來啲顯示器係買返尖沙咀間錶行，以便提升公司電腦系統質素。跟住佢就話要趕住返公司做嘢，然後一行人急步上咗架豪華七人車離開，臨走前都好有禮貌咁同卓妮講拜拜。
Thunderbolt顯示器推出只有兩個幾月，賣點係擁有廿七吋LED背光屏幕，超靚色彩同音質，內置極速I/O傳輸技術，連接埠可以串連六個裝置，仲有內置FaceTimeHD鏡頭同咪添，盛惠七千六百八十八蚊。功能咁多，Karson作為擁躉當然唔會放過啦！
卓妮