雖然手術成功，不過病人死亡，如果有一個醫生咁樣同你講，你嘅反應大概係：躝開啦，咪玩啦，好地地一個醫生唔好學人棟篤笑搞爛Gag啦！
之不過咁，事實上的而且確發生咗一件咁啼笑皆非嘅怪事。十三歲男童張睿霆喺屯門醫院接受頸椎關節矯正手術，經過十二粒鐘群醫會診，手術成功，病人死亡。
喂喂喂，到底發生乜嘢事呀？又話手術成功，點解病人會死？最想知道答案嘅係霆仔嘅父母，前日喎，張父手持愛子遺照，喺太太同親屬陪同之下，由屯門醫院大堂操去急症室大叫：「屯門醫院醫死人！」然後上二樓去到手術室門外鳴冤：「我個仔就喺呢度做完手術推出嚟死咗！我依家嚟攞番個公道！」張父一度激動到同保安員推撞，結果雙雙倒地，驚動警員戒備。
莫講傷心欲絕嘅父母想了解真相，全港市民都希望得個知字。畢竟人人都有機會幫襯醫院，特別係前一排輪住入廠大修做「特區病夫」嘅一眾高官，萬一有病睇醫生變咗誤墮鬼門關就大吉利是。
霆仔嘅不幸經歷大概係咁，手術之後十五分鐘情況急轉直下，懷疑有醫護人員拔除呼吸喉管出事，導致霆仔大腦缺氧超過二十分鐘，一度心跳停頓，然後昏迷不醒，送入深切治療部半個月終於與世長辭。
問題係，到底係咪醫療失誤？究意有冇人為犯錯？根據張母嘅講法：「涉事醫生自被家人質詢疑點而未能回覆後，採取不道歉、不慰問、不露面、也不交代的冷漠態度，把母親碎了的心，折騰得不斷淌血。」
唉，講開又講，屯門醫院出現手術成功、病人死亡嘅騎呢個案，已經唔係第一次。大概半年前之嘛，有一位叫做文愛興嘅六十歲女士，喺屯門醫院接受微創手術清理腎石。經過一輪唔算太複雜嘅程序，醫生向家人宣布，手術十分成功。點不知手術之後情況又係急轉直下，文愛興女士又發燒又嘔吐，離開醫院三十小時之後再次入院。醫生話要做第二次手術，結果，死咗。
功夫茶真係好想問一問食衞局局長周一嶽，香港嘅醫療系統係咪患上絕症？因乜事幹咁多病人枉死？如果真係醫療失誤，會唔會同人手長期短缺有關？你知啦，醫生又流失，護士又逃亡，偏偏急驚風遇着慢郎中，周局長硬係遲遲都未有解決辦法，醫院真係危機四伏o架！
好心屯門醫院認真向死者家屬好好交代，同時又好心周局長考慮一個嚴肅問題，如果閣下係香港醫療系統嘅腫瘤，唔該引刀成一快自己割自己啦！