兩大疑似特首候選人已相繼辭職備戰特首選舉，鬧得㷫合合，白鴿黨主席何俊仁（鐵頭仁）都唔執輸，尋日又宣布有意參選特首，又話要爭取泛民支持。不過，同是泛民一分子嘅教協會長馮偉華轉頭就話，嚟緊廿三日會搞個疑似特首選舉論壇，但竟然冇預鐵頭仁。莫非教協深明小圈子選舉嘅政治現實，明知鐵頭仁無機會，所以唔預佢？
馮偉華當然唔會咁現實啦，實情係鐵頭仁報咗名參選區議會，搵佢去論壇會好麻煩，所以今次唔預佢喎。馮偉華又話，由於兩個疑似候選人唐英年及梁振英（CY）都好少講教育政策，所以特登搞個公開論壇，逼吓佢哋表態喎，到時會由教協會員喺現場或者透過電郵進行發問。
據講唐唐已經鐵定話會出席，至於CY就仲度緊時間，但無論如何佢哋兩個都唔會同台辯論，即係唔會有正面交鋒，照咁睇，個論壇應該都似係各自表述，全無火花可言，好似無咩睇頭喎！鐵頭仁仲報名參選屯門區議會樂翠選區，對手有人民力量陳偉業及獨立人士沈錦添。