政情：阿人印尼國服平靚正
職工盟立法會議員李卓人上月底跟隨立法會代表團，到訪印尼參加亞洲議會大會亞洲好友合作原則會議，互相討論有關工人權益嘅問題。
估唔到只係去咗短短幾日，阿人就成個印尼人咁款返港，尋日就着住件印尼國服Batik（蠟染）去立法會新大樓綵排，仲大讚印尼國服着得好舒服喎。
阿人件Batik睇落好有民族色彩，佢話件衫唔係好貴，只係一百五十港元就有交易，由於佢去到印尼要出席會議，所以衣着要好得體，但佢又唔想打呔咁嚴肅，所以着印尼國服就可以滿足晒佢兩個要求喇，件衫款式靚兼且質地透氣、柔軟，非常之適合夏天穿着。
雖然阿人讚到件衫天上有地下無，但佢只係買咗一件咁多，連老婆都冇份。阿人就耍手話唔使買衫畀老婆，事關佢太太不時會去印尼，既然係咁，阿人不妨等太太下次去印尼嘅時候託太太買多幾件囉。