政情：小學生轟缺德港鐵客
唔少人搭過港鐵都領教過，身邊總有人大大聲講電話，呢啲缺德行為連小學生都睇唔過眼！港鐵同香港話劇團合作舉辦「鐵路安全之達人」之正邪爭鬥話劇，提高小學生乘搭港鐵嘅安全意識及遵守秩序。尋日出席首演揭幕禮嘅小五學生李詩緣話，除咗大聲講電話，佢仲見過家長幫BB換紙尿片，感覺非常不雅，睇嚟成年人應該檢點啲做個好榜樣先至得。
李同學仲話，乘搭港鐵扶手電梯時，鞋帶曾經試過卡喺電梯罅，好彩最後及時掹番出嚟，有驚無險，自此搭電梯都加倍小心，果然係醒目女。港鐵就話，呢個畀小學生睇嘅劇目會由下月起至明年五月，喺五十間小學巡迴演出，預計有二萬名小學生欣賞到。
尋日首場演出，港鐵事務總經理梁陳智明同香港話劇團理事會副主席蒙德揚都親身推銷，梗係啦，從小教育好過大咗先嚟教嘛！