政情：阿Ron暗寸行會「二五仔」
夕陽政府大勢已去，眾叛親離，近年多名行政會議非官守成員，經常公開同政府「唱反調」，例如剛辭職備選特首嘅前行會召集人梁振英（CY）就係其中一分子。CY走後，行會成員夏佳理（Ron）尋日就首次以召集人身份出席行會，點知佢喺會後重申會遵從集體問責嘅原則，聲言唔會公開同政府唱對台喎，聽落好似係暗寸緊部分行會同僚。
阿Ron話，行會運作成熟，更換召集人後會一切如常，而目前最重要嘅工作就係為下周發表嘅施政報告做準備。佢又話，目前行會做嘢方法有改善空間，希望更有效掌握政策措施內容，從而更有效向特首表達意見。至於具體改善方針，佢就冇正面回應，又指尋日有部分成員缺席會議，所以暫未有定案，但強調會盡快同各成員交流意見，尋求共識，並再向行會秘書處及特首辦商討。