政情：新立會綵排甩漏現形
立法會尋日喺新大樓搞迎新活動，包括睇升旗禮及綵排大會、內務委員會及財務委員會等各式會議，仲喺新大樓宴會廳食晏試菜，直到傍晚，立法會行政管理委員會就一錘定音決定搬屋，準備下周三復會。不過，尋日嘅綵排就發現新大樓仲有好多無名腫瘤未清，唔單止表決結果顯示出錯，更有「豆腐渣」寫字枱層板突然塌下刮傷議員右腳流血，唔通真係要夾硬遷就煲呔曾喺新大樓宣讀施政報告不行？
投票測試點錯數
尋日綵排密麻麻，朝早喺會議廳舉行嘅大會看似順利，燈光、音響及表決系統都運作正常，但其實有暗病冇人知。原來用作計算議員發言嘅計時器好唔穩定，會無喇喇突然熄咗，萬一將來議員發表偉論，真係講到天黑都未夠鐘。下午移師去會議室綵排內會及財會，點知輪到財會轄下嘅工務小組委員會測試投票時，明明有十四位議員贊成，但顯示屏顯示只得十三位。
後來查找不足至發現，可能係有議員㩒掣嘅時間同電腦計算結果嘅一瞬間出現時差，令到電腦無法計算嗰一票在內。嘩，工務小組負責審批工程撥款，如果喺好似廣深港高鐵工程撥款呢啲大鑊嘢上出錯就弊喇。跟住輪到白鴿黨李華明（肥仔明）掛彩，話說佢喺會議室坐坐吓，突然間枱底有塊層板倒塌，刮損咗佢右腳，佢仲好心話好彩傷嘅係佢，萬一係女議員就慘喇。
估唔到一日嘅綵排測試就令啲甩漏問題現晒形，新大樓真係十足紙板公仔咁脆弱。其實仲有好多問題未解決，好似自由黨主席劉健儀就話會議室啲枱角唔夠圓滑，稍一不慎就會整親人。至於其他小問題，就有「五散人」林大輝及工聯會黃國健嫌張櫈好易移動，令人坐得唔舒服喎。
雖然新大樓問題多多，但行管會仍以五人贊成、一人反對及一人保留下通過搬屋，既然決定咗就惟有頂硬上，好似為方便市民去呢座好似孤島嘅新大樓，決定開放往來新舊大樓嘅穿梭巴士畀市民使用，仲會催逼當局快啲搞掂交通及道路配套。都係嗰句，點解唔搞掂晒先至入伙呢？