政情:中環出更:晏紫老爺證新抱懷孕半年

有「中國舒拉寶娃」稱號嘅中國網壇大姐晏紫,有喜嘅傳言終獲證實。晏紫老爺信義玻璃主席李賢義日前出席一酒會時,親口向卓妮證實,新抱仔已經懷孕六個幾月,佗緊嘅係BB女。李家將有弄瓦之喜,真係可喜可賀!

晏紫前年底下嫁李賢義之子李聖根,馬拉松式嘅豪門喜宴轟動中港兩地。婚後晏紫並冇翹埋雙手做少奶奶,反而鬥志高昂、四處征戰,目標直指明年倫敦奧運會,將生BB計劃擺喺次位。不過,人算不如天算,今年五月法國網球公開賽前夕,傳出晏紫懷孕而缺席嘅消息,此後一直未見晏紫再現身大小賽事,傳聞始終未獲證實。

弄瓦之喜

難得見到李賢義,卓妮梗要問個清楚,佢大方承認晏紫已有身孕六個幾月,腹中塊肉係個BB女。咁咪係個小龍女?李賢義笑不攏嘴話:「差唔多」。計真啲,原來BB女若搶閘出世,分分鐘係個小小兔女郎添!

李賢義係聞名中港嘅富商,但佢好殷實低調。講起抱孫,原來佢早已做阿爺,最年長嘅孫輩都有十幾歲喇!

「Money18免費即秒股票報價網站」現推出8升級功能,財經資訊,實時實發!