政情：中環出更：四川通帶隊 考察重建景象
汶川大地震眨眼間已三年多，災後重建再現一番新景象。信和置業主席黃志祥公子黃永光（Daryl），上月底就拍住同屬四川省政協嘅東源大地物流公司老闆王嘉恩（Albert），一齊帶隊考察四川重建後嘅變化。天府之國美食多，Albert拉隊品嘗風味「原漿啤酒」，仲大擦「兔肉乾」，回味無窮。
今次考察團有近五十人參加，Daryl擔任榮譽團長，Albert就係秘書長。團友精英雲集，包括全國青聯副主席陳仲尼、莊士集團太子爺莊家彬、全國政協常委楊孫西公子楊華勇及菁英會主席洪為民等。
Daryl同Albert係「四川通」，帶隊到訪地震重災區映秀鎮及都江堰，唔少團友初次訪川，目睹災後扭曲變形嘅樓房遺址，大表驚訝。Albert話，回想地震發生一刻，當時佢身在成都公幹，親歷猛烈搖晃，至今諗起都一額汗。
歎原漿啤酒掃兔肉乾
講番食，唔少得品嘗正宗麻辣火鍋，Albert介紹團友飲當地著名嘅「原漿啤酒」，標榜不含防腐劑，每樽保存期僅七日，雖然賣逾百元人仔一支，但團友都爭住飲番支。飲落口，感覺清新鮮味，認真爽！
臨走前，團友又狂掃馳名「兔肉乾」，嗒落似豬肉乾，肉味濃郁，最啱買嚟做手信。