政情：劉展灝訪巴西印象差
要做成功嘅生意人，觸覺一定要好敏銳，為尋商機就算要去天涯海角都在所不辭。工業總會副主席劉展灝就趁暑假期間遠赴南美，睇吓有乜發展機會。不過佢對於金磚四國之一嘅巴西，印象就麻麻地嘞。
劉展灝話佢剛踏上巴西嘅國土，就有溫馨提示：切勿喺街上用手提電話，同埋唔可以離開酒店五十公尺，由此可見當地嘅治安係幾咁堪憂！不過最令生意人困擾嘅係高昂嘅稅率，劉展灝話巴西嘅入口稅可以高達廿個巴仙，十分驚人。反觀巴西嘅鄰國智利，入口稅就低得多嘞，加上治安環境較好，置身此地猶如身處歐洲，確係令人感覺良好。可惜世事係無兩全其美。論人口，國土面積與資源蘊藏，智利都遠不如巴西。儘管有好多不如人意嘅地方，巴西嘅經濟始終甚具潛力，係一個不能輕視嘅市場。
劉展灝又話歐美呢兩位大主顧，經歷金融海嘯之後元氣大傷，所以生意人要行多兩步去一啲未成熟嘅市場覓新機會喎。