政情：陳兆焯潮Look有利溝通
唔係逢係教育工作都係嚴肅保守嘅，正生書院校長陳兆焯就係衣着裝扮都緊貼潮流，原來為人師表都可以好時髦㗎。
曾經係千禧年傑青嘅陳兆焯，尋日以黑色外套配白色波鞋出席傑青記者會。陳校長話教師嘅傳統衣着，多數都係恤衫西褲，顏色不離藍白灰黑，較為沉鬱，而佢個人就比較鍾情既時髦又色彩繽紛嘅衣着。陳校長話，衣着品味其實係個人內心嘅反映，由於佢自己嘅性格樂觀開朗，加上獨立嘅思維，選擇衣飾嘅時候必然拒絕隨波逐流。
陳校長話自己早年喺加拿大求學受到開放風氣薰陶，佢返港教書，當時嘅校長容許着潮服，結果同事都畀佢感染。就算依家做咗校長都唔變，反而佢入時嘅衣着，好易同家長學生打成一片，溝通起上嚟都容易啲。