政情：李梓敬難忘帶團驚嚇事
自由黨青年團主席李梓敬（Dominic）今年首度參加區議會選舉，嚟緊將會喺葵青新石籬選區出選。Dominic喺呢個區服務已經一段時間，搞咗咁多次活動，佢印象最深刻係有一次為街坊搞釣墨魚團，點知半路中途唔見咗其中一位團友。佢同班職員都好緊張，大家一齊搵咗成晚。
Dominic憶述，當日先同班街坊去鯉魚門食飯，之後坐船去西貢，殊不知食完飯已經發現有一個團友唔見咗，成班義工職員搵勻都唔見人，打電話對方又唔聽，結果最後決定佢繼續帶團完成行程，同事就留守繼續搵，當時大家個心都好驚，擔心出意外。
團友失蹤幸尋回
結果喺第二日，佢哋先聯絡到嗰位失蹤團友。Dominic唔揣測對方做乜突然失蹤，對方冇事已經足夠，其他都唔重要。呢次「意外」亦令佢明白到地區服務責任真係好大，同埋有肯付出嘅義工真係好重要喎：「班義工仲緊張過我，真係好感動呀！」喺新石籬出選嘅仲有梁國華同陳嘉樂。