政情：羅范：為官忌「揸專線車」
全國人大港區代表羅范椒芬（Fanny）離開政府前，係少數好有心嘅政務官，唔少人認為就係因為佢做嘢相當肉緊，先至會充滿棱角。離開政府四年，佢依家至語重心長提出忠告：「有啲官似揸緊專線小巴……淨係識得直接返工放工，好少會搭的士聽取民意，同市民正面接觸」、「教改最欠缺嘅係同家長同其他持份者嘅溝通，在配套上欠缺咗家長教育」。佢又話依家政府部門做嘢往往各自為政，政策推出好多時都得唔到市民支持。佢話到明欣賞梁振英，對Fanny嘅總結，唔知梁振英有冇同感呢？
Fanny幾句說話，已經講穿特區政府嘅問題，不過喺佢離開政府之後呢四年，特區政府嘅自以為是病，不但冇改善，仲愈嚟愈嚴重添。究竟呢個政府仲要吸取幾多血肉嘅教訓，犧牲幾多有心嘅政務官，至會一朝夢醒，明白聽取市民同用家意見嘅重要？Fanny尋日又喺電台節目話，香港有好多有思想嘅人，可以畀到從政者好多有價值嘅意見，佢呼籲下屆問責團隊應該要走向前線，多啲落區同市民接觸，唔可以淨係顧自己嗰瓣。
讚CY堅決參選「算贏咗」
講番兩個疑似特首候選人開始積極備戰，手握一票嘅Fanny話兩位候選人嘅差異不大，優勢未明顯，暫時未決定到支持邊個做下屆特首，不過佢就好欣賞梁振英不被勸退，堅決參選嘅決心，仲盛讚佢肯出嚟選就已經係一件好事，喺歷史上已經算係贏咗啦喎。做過廉政專員嘅羅范椒芬又話，特首選舉應該要公平、公正、公開，唔希望候選人淨係識拍膊頭拉票，又認為下屆特首唔應該淨係要爭取商界支持，要平衡各界意見，解決本港貧窮同埋經濟等深層次矛盾。
開宗明義支持梁振英出選特首嘅立法會會計界代表陳茂波就話，已經應承咗幫梁振英助選。茂波盛讚梁振英有變革能力、有魄力、夠膽擔當同有韌力，可以領導香港應付未來嘅經濟變局同改革喎。而前商務及經濟發展局局長馬時亨就話，行政長官選舉有競爭係好事，又話唐英年同梁振英兩人各有優點，一個係科技股，一個係公用股，都係對香港有承擔嘅人，誰勝誰負就要睇佢哋嘅政綱同班底喇。