政情：趙資強區選不戰而勝
區議會選舉已經截止提名幾日，原本以為冇乜大變動，點知尋日突然又多咗個參選人自動當選，佢就係競逐連任東區區議會上耀東選區嘅工聯會趙資強（圖）喇。趙資強本身係貨櫃運輸業職工總會主席，已經做咗幾屆區議員，今次忽然自動當選，相信佢都始料不及。
我哋尋日收到趙資強通知，話自己自動當選，同時仲將一份選舉事務處傳畀佢嘅「提名是否有效的決定通知書」畀埋我哋，上面寫住佢原本個對手盧志強提名無效，由於嗰區只得兩個參選人，換言之佢已經自動當選，佢就多謝各界友好嘅支持，會盡力做好下屆議會工作咁話。
我哋尋日搵唔到盧志強求證，而趙資強就承認份文件係由佢發出，肯定唔係惡搞，佢仲話就算要選都肯定會贏喎！趙資強不戰而勝梗係開心啦，但東區就認真冇選舉氣氛喇，事關加埋佢已經有十四個選區嘅參選人自動當選，唔使投票又點會有氣氛吖！